NC bae i helpem Vanuatu blong buildim national Universiti

Gavman blong New Caledonia i redi blong helpem Vanuatu blong buildim national universiti blong hem.

Presiden blong gavman blong New Caledonia, Philippe Germain, i mekem tok tok ia long las sande taem we hem mo Praem Minista, Charlot Salwai, tufala i anvelem fes fandesen ston blong niu klasrum blong akomodetem ol fracophone student blong “License blong Administration Economique et Sociale” long AUF campus long Port Vila.

Mr Germain i talem se hemi mekem plande yia nao we gavman blong New Caledonia tru long cooperation program wetem Vanuatu, hemi stap wok wetem gavman blong Vanuatu, gavman blong Franis mo AUF blong holem taet francophonie long sekta blong education long Vanuatu.

Presiden Germain i talem se gavman blong New Caledonia hemi help long saed blong mani mo hemi helpem ol francophone skul tu long saed blong ol material mo trening blong ol titsa.

Hemi talem se New Caledonia, hemi givim long evri yia 50 milien vatu blong helpem development blong Vanuatu. Mr Germain i talem se mani ia hemi smol komperem long ol nara mani we ol dona kantri, oli stap givim ikam long Vanuatu be hemi talem se hemia, hemi riprisentem 60% blong total mani we gavman blong New Caledonia, hemi stap givimaut long saed blong regional cooperation blong hem. Hemi talem se gavman blong New Caledonia, hemi no lego yet ting ting we management blong AUF i bin go talem long hem ting ting blong openem wan universiti we hemi save ofarem hae stadi long ol francophone blong Vanuatu. Mr German i talem se taem ia long 2012, gavman blong New Caledonia, hemi mekem wan bigfala promes long Vanuatu from we long taem ia ikat Emalus Campus be hemi ofarem ol stadi nomo long inglis.

Hemi talem se hemi hapi blong lukim se folem promes blong 2012, ol universiti olsem blong New Caledonia, Franis Polynesia, Toulouse mo Rennes, oli ofarem help blong olgeta we hemi lid igo long Licence long saed blong Administration Economique et Sociale, AES. Long 2015, ol fes student blong Vanuatu, oli kasem pepa blong olgeta long saed blong AES. Mr Germain i talem se niu klasrum we hem mo Mr Salwai, tufala i leiem fes fandesen ston blong hem long las sande, bae hemi helpem ol student blong oli stadi long wan gudfala kondisen.

Mr Germain i talem se ikat yet national universiti blong Vanuatu blong buildim mo hemi talemaut long foret blong plande pipol we oli bin stap long AUF long las sande se hemi komitim hem blong helpem rialaesesen blong projek ia.