PM Salwai mo Presiden Germain i leim fandesen ston blong AES


IMG_0334IMG_0336
 Praem minista, Charlot Salwai i talem se gavman blong New Caledonia, hemi wan long olgeta 5 patna blong projek we oli kolem Administration Economic et Sociale, AES, long 2011. Olgeta patna ia, ikat Agence Universitaire Francophione, Gavman blong Vanuatu, Franis ambasi long Vanuatu, Universite de Toulouse Capitole 1 mo UT1. Mr Salwai i talem se gavman blong New Caledonia blong New Caledonia, hemi wan long olgeta main patna we hemi bin help blong fainensem long 2009, ol instolesen blong ol campus blong francophone long olgeta aelan. Hemi talem se ol francophone, ikat 6 evriwan long 6 province blong Vanuatu. Praem minista i talem se tufala projek ia, tufala i soem gudfala risalt long saed blong kualiti blong ol student we oli folem tufala program ia, program blong teaching we istap long tufala project mo hat komitmen blong ol titsa.
Praem minista i mekem tok tok ia long yestede, Sande 3 March, long taem we hem mo Presiden blong gavman blong New Caledonia, Phillipe Germain, tufala i anvelem fes fandesen ston blong  niu klasrum blong “License en Administration Economique et Social (AES)” or “Licence blong Economic mo Social Administration” long yestede long AUF graon long Port Vila. Mr Salwai i talem se ples we AUF istap long hem, hemi wan impoten eria blong ol francophone blong Vanuatu. Praem Minista i talem se long ples we AUF istap long hem tede, hemi bin ples we oli bin welkamem fes darekta blong UAF, Mr Bremont, long hem long 1997. Praem minista i talem se hemi bin stap tu long taem ia olsem we fes politikol advisa blong ministri blong Education. Praem minista i talem se graon we AUF istap long hem long tede, hemi wan strategic ples from we hemi stap klosap long ministri blong edukesen mo hemi stap klosap tu long Lycee Louis Antoine de Bougainville mo  VIT. Hemi talem se stat long taem ia, ikat plande gud fala samting, oli bin happen long pis graon ia kasem launching blong “Licence Francophone en Administration Economique et Sociale blong University blong Toulouse we oli sitemap long Port Vila.
Mr Salwai i talemaut long olgeta big big man mo woman we oli stap long launching seremoni blong yestede se day ia, bae hemi stap oltaem long histri blong AUF long Vanuatu from we hemi lukim tufala lida blong gavman blong ol Melanesian kantri we tufala i serem franis lanwis wetem semak kaltsa mo tradisen, tufala i witnesem launching seremoni long yestede.
Praem Minista Salwai i talem se presens blong hem long seremoni ia wetem blong Presiden Germain i konfomem solidariti long  Francophonie,  commitment blong tufala blong co-operate klosap long ol sabjek we i konsenem tufala mo tu long ol kuesten we oli tatsem ol regional mo international institusen.
Praem minista blong Vanuatu i talem se presens blong hem mo blong Mr Germain long launching blong fes fandesen ston yestede, hemi mekem rilesensip mo FRATERNITY blong tufala ikam strong moa blong benefitim laef blong blong pipol blong tufala.
Mr Salwai i talem se fes fandesen ston ia hemi wan tru witness blong Francophonie long Vanuatu. Hemi soem se inters blong ol Ni-Vanuatu, hemi stap gru blong lanem, tok tok mo wok long lanwis blong MOLIERE mo ol pipol blong Vanuatu, oli kat evri risen blong oli mas glad long hem.
Mr Salwai i talem se niu building ia, bae hemi mekem se Vanuatu, hemi save inkrisim kapasiti blong hem blong risivim moa student blong DEAU, Baccalaureat mo yia 14 long VIT mot u possibiliti blong kasem ol skolasip long ol regional mo international universiti.
Praem minista i talem se gavman, hemi kat diuti mo responsabiliti igo long ol fracophone youth blong diversifaem program blong yumi.
Mr Salwai i talem se hemia, hemi inkarejem Vanuatu blong gohet blong mekem rifom long saed blong trening blong impruvum level blong ol yang student blong Vanuatu mo blong gat ol gudfala titsa.
Praem minista i talem se rifom ia, hemi long saed blong riserj blong mekem se ol stadi we oli proposem mo ol titsing material, oli go wetem prioriti blong gavman mo oli ansarem tru nid blong pipol blong Vanuatu.
Praem minister i talem se wetem wan projek olsem we oli bin launchem long yestede, yumi kat obligation blong win blong kasem wan way blong groem seves mo politikol ekonomi blong Vanuatu.
Praem minister i talem se gavman blong hem, hemi committed mo hem tu, hemi komitim hem blong givim moa chanis long ol francophone we oli kasem diplom blong olgeta long public mo praevet sekta. Praem minista i talem se blong kam wan francophone, hemi wan bigfala chanis we sam ting ting insaed long Vanuatu, oli no wandem luk save o oli no wandem admitim. Praem minista i talem se situation bae hemi save jenis long olgeta day mo manis we istap kam.
Praem minista i talem se seremoni blong anvelem fes fandesen ston long yestede, hemi no sapos blong mekem se yumi stap long sem level o mekem yumi rives igo bak bihaen be seremoni ia, hemi mas mekem yumi igo foret long tru world blong tumoro.
Mr Salwai, hemi talem tankiu long Presiden Germain long initiative blong gavman blong New Caledonia blong proposem wan DOSSIER blong help blong fainensem establishment blong wan national universiti blong Vanuatu.
Praem minista Salwai i talem long Presiden Germain se hem olsem praem minista, hemi sapotem fulwan DOSSIER ia long saed blong faenens mo long proses blong rialaesem blong mekem se hemi save gohet long taem we tufala tugeta, bae tufala i agri long hem. Hemi talem se sapot blong hem ia, hemi mekem finis wetem kontribusen blong gavman blong hem long AES semak long USP.
Praem minister Salwai i talem se hemi kat konfidens long sakses blong projek we istap long plan blong karemaut mo bae oli ri-enfosem kapasiti blong ol francophone blong Vanuatu long sakses blong helpem olgeta blong fainem wan ples blong olgeta mo blong participeit fulwan long ol desisen blong kantri blong olgeta long saed blong ekonomi, social, kaltsa mo politik.
Praem minister Salwai i talem long Presiden Germain, se hemi luk fowod blong holem taet mo mekem ikam strong baelatrol koperesen long evri level long interes blong kominiti blong tugeta kantri mo ol young pipol blong tugeta kantri.
IMG_0377
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s