Pentecost i onarem niu PM long Sariboh rank


PM Sariboh wetem Mariak Alosio Barang
Long las satede, plande handred pipol blong aelan blong Pentecost, oli bin kam tugeta long Katolik misen blong Melsisi blong welkamem niu praem minista blong Vanuatu, Honorable Charlot Salwai Tabimasmas mo witnesem pig killing seremoni blong hemi save karem hae kaston rank blong  SARIBOH.
Ol Mariak mo ol Tanmonok, oli mekem hemi go tru long wan killing pig seremoni blongm mekem se stat long taem ia, niu praem minista blong Vanuatu, hemi karem naoia wan niu nem blong Praem Minista Sariboh Tabimasmas. Tufala hae tsif we tufala i supavaisem pig killing seremoni ia, hemi Chief Tanmonok Isaac Bulewak mo Chief Adan Bulesispat Virali. Sariboh, hemi wan hae level nem blong kastom rang blong aelan blong Pentecost. Long kastom blong Pentecost, taem we wan tsif, hemi kasem level blong Sari, wan long olgetan important responsabiliti blong hem, hemi blong serem ol tok tok mo wanem we hemi kat long ol pipol blong hem. Oli stap talem se long kastom blong Pentecost se taem wan chief, hemi karem kastom rank blong Sari, hemi wan chief blong “share”. Tanmonok Isaac i talem se taetol blong tsif we oli givim long niu praem minista, hemi folem tu wanem we praem minista Sariboh Tabimasmas, hemi mekem long laif blong hem olsem wan man blong politik mo wan pikinini blong Pentecost. BOH, hemi minim long lanwis blong sentrol pat blong Pentecost, hemi poen olsem poen we wan plea, hemi makem long taem blong wan futbol match.  BOH, hemi poen we wan man o woman i makem o skorem long taem blong wan kompetisen.Tanmonok Isaac i talem se fes poen we Praem Ministan Sariboh Tabimasmas, hemi makem, hemi long taem we hemi kontestem eleksen long festaem mo hemi winim eleksen mo kam wan MP. Ol tsif kastom blong Pentecost, oli luk luk tru long ol poen we Praem Minista  Sariboh Tabimasmas hemi mekem long politikol karia blong hem. Oli talem se long taem blong hem olsem MP blong Pentecost, hemi bin sevem tu sam gavman blong ol foma praem minister taem we oli fesem politikol kraesis. Oli talem se long taem blong ritrit long Pele aelan, hemi bin skorem wan moa poen taem we ol lida blong ol politikol parti, oli tsusum nem blong hem blong kam kandideit blong olgeta long posisen blong praem minista. Nara poen we hemi makem, hemi long taem we 46 memba blong palaman, oli votem hem blong hemi kam niu praem minista blong Vanuatu mo semtaem tu niu praemm minista we hemi kamaut long sentrol part long aelan ia. Hemi namba tri praem minista we hemi kamaut long Pentecost. Ikat Late Father Walter Lini mo Ham Lini. Ol tsif i talem se long histri blong politik blong Praem Minista Sariboh Tabimasmas, las poen we hemi tes makem, hemi taem we 5 MP blong Union blong Modereit Party, oli tekem desisen blong joenem koalisen gavman blong hem.
Kastom taetol ia, Sariboh, ol kastom chief givim long hem wetem kastom strap blong hem we oli kolem Malmasang. Folem hae rank blong ol tsif we ol chief oli givim long hem, hemi givim ova long 40 red mat igo long ol anty, ol papa blong hem mo difren nakamal mo nasara blong sentrol Pentecost.
PM Sariboh Tabimasmas, hemi talem tankiu long hae tsif from taetol ia mo respek we oli givim long hem. Hemi talem tankiu from prea blong ol pipol blong hem from sapot we oli givim long hem stat we hemi kam MP mo tede, hemi kam praem minista.
Praem Minista Sariboh Tabimasmas i talem se tankiu long sapot blong pipol blong Pentecost long kontribusen blong olgeta long taem blong vot mo blong mekem fes visit blong hem igo long aelan ia olsem praem minista, hemi saksesful. 
Nara kastom rank, ol chief blong Not Pentecost, oli bin givim long taem blong Lini DE. Kastom nem ia, hemi KAMAL GOGONA we hemi mini tabu nakamal. Kastom nem ia, hemi mekem se naoia PM Sariboh Tabimasmas, hemi gat wan papa mo wan mama wetem ol aunty blong hem long Not blong aelan ia.
Ol pipol ia we oli kam stap long Melsisi, oli kamaut long ol difren area stat long Namaram eria, Central Ist mo long Saut Pentecost blong welkamem PM Sariboh Tabimasmas, tufala Reunification Movement for Change memba blong palaman blong Santo, Honorable Marco Mahe, RMC MP blong Malekula, Honorable Marcelino Barthelemy Telukluk mo National United Party memba blong palaman blong Pentecost, Honorable Francois Chani mo ol nara memba blong delegesen blong hem. Taem we delegesen blong Praem Minista Sariboh Tabimasmas i kasem Lonorore Airport, ol chief blong Lebati wetem ol pipol blong olgeta, oli stap blong tekem olgeta tru long wan kastom tanis igo long ol trak.
Delegesen blong praem minista, hemi bin lego Lonorore Airport wetem laenap blong 6 trak igo long Melsisi. Saen blong welkam, hemi kamaut stat long Vanwoki eria narasaed longh Ranwadi Hae Skul we hemi abaut 2 kilomita long Melsisi wetem ol tok tok blong welkam we oli raitem long wan wait kaliko mo hangem krosem rod. Long rod blong hem igo long Melsisi,praem minista, hemi bin go festaem long vilej blong hem blong Vansemakul blong putum ol flaoa long greiv blong Late papa blong hem, Henri Buletali mo Late mama blong hem, Maria Mabonsangul. Afta long respek long greiv blong tufala olfala blong hem, PM Sariboh Tabimasmas wetem delegesen blong hem, oli muv igo long Melsisi. Long Melsisi, plande handred pipol, stat long pikinini kasem ol olfala man mo woman, oli bin stat laenap long tugeta saed blong rod blong welkamem niu praem minista. Stat long solwota, ol pikinini blong skul, oli bin sing sing mo tekem praem minista igo kasem wan tanis kastom blong Vanmelang. Tanis kastom blong Vanmelang we hemi eria we PM Sariboh Tabimasmas kamaut long hem, oli bin tekem long wan kastom sing sing we oli komposem abaut hem we hemi kam niu praem minista. Kastom welkam blong Vanmelang, hemi bin lidim delegesen blong praem minista blong oli putum flaoa long greiv blong ol misinari. Afta long rispek long greiv blong ol misinari, kastom blong Ila mo Gun i tanis wetem delegesen igo kasem long ples blong speech. Afta long welkam tok tok, MP Chani i fes wan blong hemi tok tok long olgeta pipol we oli bin stap hip andanit long hot san long taem ia. Afta long ol tok tok, i bin kat kakae blong evriwan folem wetem ol tanis kasem tutak blong gohet wetem pablik kava.
Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s